換著係我，唔好話俾沈佳儀用筆篤，俾佢喺背脊紋隻哈囉kitty都得。睇完套戲，d少男情懷好似打噴嚏時既鼻涕，傾射而出，一發不可收拾。
荳蔻情種，咩最純真，最無垢，咩人都受。我都嚮往，無非因為那些年，我地仲會識得含羞、忐忑，我都會在意對方點諗，亦會肯花盡心思咁表現自己，但又一定要做 到唔嗲唔吊。自信做得好，我地會雀躍，出左醜，我地會如坐針氈，好似世界未日 - 無他，因為以前單純，曉得珍惜，以為真係非妹不娶，所以先會瞓身。好多時候，呢d荳芽春夢，都係不經不覺，一輪調笑，慣左逗弄，自己就糊里糊塗鐘意左佢 - 唔好理、亦都唔知係咪愛，總之就係想賴在一起。由於感情不經不覺，再加上男女之間經驗尚淺，進退失據，一時胡思，或一時大意，就好多時失諸交臂，花開，但結不了果。
人大左，男女識多左，所謂交往，已經唔係以前既不知不覺，好多時候，以男對女黎講，都好有目的，有好強既佔有慾，有好厲害既攻擊性，有好多心計既盤算。
年紀大左，只有面皮厚，再無含羞﹔
只有鷹隼般專注獵物，再無忐忑﹔
只有一切以自己面子同保護自己打算，再無所謂樣樣先諗對方﹔
只有刻意既不屑一顧拋磚引玉，再無意亂情迷既唔嗲唔吊﹔
只有衰左咪下個既豁達心態，再無下下天崩地裂既矢志不逾﹔
只有綿裡藏針既挑逗性攻擊，再無純粹討她一顰既天真爛漫﹔
只有行埋就諗起機，再無但求喺埋一起既單純﹔
成人既愛情，不是一縷煙，如霧似幻，就是一把刀，見血封喉﹔細個既戀愛，可以好甜蜜，頂多係青澀。
所以，那一年獨有既愛情，再加上記憶跟時光塗脂抹粉，過去，永遠美好。尤其當現在飽受現實煎熬既你，發現成人愛情猜心太多、祈望有差、維繫艱難既時候，你就更覺當年源於無邪既無憂無慮。
我地都很想回去，偏偏現實教我們回不去了。
可以天真的話，邊個唔想傻下去?
所以，我地，都愛"那些年"。
我不時會諗：究竟香港既所謂港女，會唔會曾經都係沈佳儀，定係沈佳儀寶島獨有?
仲有，女主角陳妍希，廿八可以扮十六，我估呢樣真係台灣特有。
總 覺得，現代人，老實講，好多都係平庸一生。喺關係裡百般盤算，喺當中攞到自以為著數既甜頭，就夠佢地以為自己眉精眼企聰明絕頂，自我感覺良好 - 一時既聰明同操控別人，成為佢地自尊既憑藉。就算明明件事一字咁淺，都硬要心裡自顧自左估右度，慌死人地以為自己豬咁蠢 - 一切盤算只在心中而不揭盅，就自然無從跟現實對質，知道對錯﹔無從知道對錯，就當然一廂情願地當正自己啱晒，結果事情反而愈攪愈複雜，自己玩死自己。
愈諗得多，真係倒不如跟九把刀當年咁，一泄如注，直到濺水為止。人大左無得變，唯有學黃子華話：拋得個身出黎愛，唔通有得愛唔愛咩，求愛，從來都係瞓釘床、上刀山、落油鍋架啦，命硬夾好彩，總會投胎投得個好伴卦。
沒有留言:
張貼留言