阿棍手記(5) - 爛人一個

我份人無咩品味，亦唔好咩野名牌，一黎盤川有限，二黎無興趣貼錢幫人宣傳，三黎有種既倒不如將自己變成一個名牌，即使艱難。

對大部分人而言，識飲識食識享受，人生歡愉至少如此。不過有品味唔等於有品：品味同學識，與做人有品與否乃兩碼子既事。你有錢、中得多廣告毒、上得多openrice，無話唔識，然而只係單純喺物慾上增進見識，唔見得令當事人喺智慧或閱歷有所昇華。你再潮再型再高檔，都不過係跟住一尐無端自封為潮流教父再加道聽途說，俾人索住鼻子走。今時今日既所謂潮流，傳播方式其實好填鴨，一味廣告攻勢無孔不入，迫你坐定定照單全收，如果得你一個，你識個屁之餘，亦未必曉得、敢於自行我路。你只不過係利用一尐明明係大眾化或真高價偽高檔既身外物黎虛構、堆砌所謂個人風格，從俗中猶想脫俗，自我感覺良好，睥睨眾生最盞。

無他，城市人，眼光狹窄，成就同銀碼掛帥，又迷戀以外物與眾不同之虛榮，就算明知心靈貧乏，成就虛無，因為一切都是自尊、形像之憑藉，唯有死充死抱，猶恐冒險有失。但係想深一層，物質社會人人自我中心，你扮得再花枝招展，睬你無幾個，奉承既好多，別人眼光不過刹那，在意的不過一時，認同不在人心，威水只在時勢，當你搏命爭取群眾認同 – 你會覺得嗰班人應該認同你，即係變相認為嗰班人理該低於你，不過你又偏偏渴求佢地既垂注喎，咩心態呢 – 咁就代表你根本唔信自己有幾巴之閉。

我係一個古人，我覺得做人可以無大志，但唔可以無超越個人既信仰：係神又好，民主又好，公義又好。只有踏出自己既愁城，只有面對自己既卑微，先可以突破自己，生而為人唔係大晒，因為人同動物，只差一線，就算動物發情取寵，都係一時，唔係成世。