阿棍手記(4) - 貓貓狗狗

雖則話睇野唔好咁片面，不過喺人間打滾愈耐，愈發覺人人面口不過兩樣 - 又或者人人面譜純粹幾款，邊得黎咁多百樣人。
先講一d喺人群裡面頗受歡迎既人，姑且佢地既性格特徵，分為貓狗兩大類。當中絕無貶義侮辱，純粹格局相似，故作比喻。
似狗者，我指係尐cute cute細狗，好鬼楚楚可憐，好鬼樂於俾人逗撩，愈撩佢，佢就愈興奮，連逗嗰個都頓覺過癮。身邊人唔撩佢，佢仲會主動黎滾攪你，為既就係討你一刻既垂注。呢種人，令身邊人感覺良好，原來有人係咁想自己留意佢，覺得自己好重要，去到邊都受歡迎。
似貓者，高傲，串嘴，平時唔太睬你，但又未至於懶孤僻離群，撩拒者，通常博俾佢串，博睇到既串look，撩唔郁佢唔甘心，撩得起佢就好似親手點著炮仗咁興奮，好似唔俾佢串過就周身唔聚財。
前者，滿足群眾施虐既心理﹔後者，成全群眾受虐既心態。兩種人，一剛一柔，喺人群中永遠受到接納。你我普通人一個，要做風頭躉，未免嚇人﹔唔介意陪笑陪坐，唔想隻影形單，搵個啱你既角色，潛身入群，打情罵俏，無錯係還是會寂寞，不過呢尐都係事後既感懷身世，嗰下你過左癮，最實際。
當然，做隻貓做隻狗，通街都有，要喺當刻搏到垂注，就要有隨時為世所棄既心理準備。嗰刻或者唔可以無左你，但又你未至於不可取替，如果你唔太自覺，老早人狗/貓合一，自然唔會無端煩惱﹔如果你不過監粗奉迎，人生無幾多個十年，自己唔做番自己，無人可以做到你，即係，你，唔再存在。
諗起都要悲秋一輪，嘆奈何。